【BF專欄】禮金有價講?6招說服未來外父外母收順啲

【BF專欄】禮金有價講?6招說服未來外父外母收順啲

Bloggers
By Planto on 01 Nov 2018

「你畀唔畀得起30萬禮金娶我個女?!」伯母提高聲線,大聲責問Kenny。

「……我……我冇。」Kenny擠唔出笑容,剛才伯母夾畀佢嘅雞脾,已唔敢放入口。

「冇你點解要搞大我個女?!」伯母用凌厲眼神狠狠啤住佢。

「……」

「……」

話說Kenny上周首次跟女友Emily見家長,席間與Emily父母言談甚歡,但當佢坦承跟Emily珠胎暗結、二人打算年尾結婚後,伯母霎時變臉,喺禮金上開天殺價,飯廳中霾漫一片dead air。

「點算好?!」Kenny苦惱地撼頭埋牆,「冷靜啲,Emily有咗,伯母仲心急過我。」魔鬼嘅聲音喺Kenny心中迴響,可惜佢始終淆底唔敢殺價,焦急如焚嘅Emily亦唔敢幫口,飯局不歡而散。

以上為真實故事改編,奉勸各位小心未婚懷孕。禮金,自古以嚟都係婚姻一大屏障,直教多對情侶嘈到分手。有人話,男方3個月薪金係合理嘅禮金「公價」,但過來人一定會知,禮金根本冇「公價」呢回事,只有未來外父外母收得開心,先係「好價」。

以下向各位計劃結婚嘅準新郎、準新娘,分享幾式禮金講價策略:

1. 提早成為「半個親生仔」

Kenny首次見家長就宣佈搞大女友個肚,女方父母當然晴天霹靂。如果,準新郎一早與伯母及Uncle建立良好關係,過時過節識做地送禮,令對方當佢係「半邊仔」,到傾禮金時自然手下留情。

2. 準新人必須同一陣線

日劇《逃跑雖可恥但有用》中,新垣結衣及星野源達成契約結婚協議後,想說服父母二人唔搞婚禮,用嘅策略係強調唔搞婚禮係二人共同決定,呢招喺兩家商討禮金時,亦十分有用。

試諗吓,若準新娘與父母連成一線,攜手向男家施壓,難免有損準新人關係。「我媽養到我咁大,你唔畀夠錢唔好娶我。」「你父母賣女咩?!」呢啲傷感情嘅說話切忌衝口而出。準新人同心合力,應付四大長老可事半功倍。

3. 事先試探底線

準新人就可負擔嘅禮金達成共識後,應分工合作,向雙方父母試探,知己知彼。美國總統特朗普寫過本《交易的藝術》,第四式就係「Know your market」。準新娘宜先探聽父母嘅「心水價」,有需要的話略述準新人嘅經濟能力及壓力,讓父母有合理期望。準新郎如預算緊絀,可問問父母能否喺禮金及酒席提供協助。

4. 人情禮金綑綁式講價

男女雙方家長傾婚禮時,禮金、人情、酒席數、餅卡、金器、過大禮形式等,樣樣可以引爆衝突。正所謂有危就有機,男家可提出將較多圍枱嘅人情贈予女家,換取女家喺人情上讓步。

5. 用意頭壓價

喺討價還價嘅最後階段,如女方家長寸步不讓,準新郎唯有「意頭價」作最後籌碼。如女家開9萬蚊,不妨還價8萬8,但用好意頭還價,但預咗作用有限,伯母甚至可以此反將你一軍:「6萬蚊?6萬8啦。差唔多姐。」所以呢招要慎用。

6. 強調有承擔及計劃

與未來外父外母傾禮金,係講價亦係交心,須動以以情,說之以理。「放心交個女畀我啦。」呢句話講就易,最難係要對方真心信任你。向未來外父外母闡述結婚大計時,請同時預備你未來幾年喺家庭及事業上嘅計劃,例如有冇打算買樓?對生兒育女有咩計劃?如何確保有穩定收入?要知道,外父外母都成家立室嘅過來人,要令佢哋信任你能擔起頭家,必須諗多幾步,表現有承擔嘅一面。

「即使我今日畀唔起30萬禮金,未來我畀到老婆同外父外母嘅,一定遠多過呢筆數。」用行動支持理據,正是特朗普《交易的藝術》第9式「Deliver the goods」。只要你能情理兼備地打動到對方,就有望達成一項令兩家大感稱心如意嘅「雙贏」禮金協議。

結婚係幸福愉快嘅事,商討禮金及婚宴時,無論遇到任何情況,都記平心靜氣,以免損害兩家人和諧。

祝各位準女婿食到外母隻雞脾。

[email protected]Planto
原文刊登於Planto網站

關於Planto

Planto係一個創新嘅智能個人理財及記賬應用程式,設iOS及Android版本,將儲錢化繁為簡,幫助香港人實現買樓、進修等人生目標。 Planto於香港大學創新及創業中心組成,係一間正急速發展嘅初創企業,我哋得到數碼港及一批來自香港、英國及加拿大嘅投資者及資深顧問支持。請即Like Planto facebook專頁及追蹤Instagram,接收我哋最新消息及第一手理財資訊!

(本文經由博客Planto授權轉載,並同意BusinessFocus編輯文章與修訂標題。文章內容為博客個人意見,不代表本公司立場。)

Text & photos: Planto


BusinessFocus現長期徵稿。歡迎各投資界、商界人士、來稿交流對各種經濟、投資、物業、商業議題的獨特看法。如蒙投稿,請寄 [email protected],另請附上不多於100字個人簡介及近照一張。 文章一經採用將由BusinessFocus編輯部潤飾,更會開設個人專欄。
Planto係一個嶄新嘅人工智能理財app,提供自動整合銀行戶口、管理及分析開支、策劃儲蓄目標等功能,令理財及追夢變得前所未有咁簡單。我哋目標係幫助80、90後年輕人建立有系統嘅儲蓄習慣,實現置業、結婚、進修、旅遊等目標。網站:https://Planto.hk fb專頁https://www.facebook.com/Planto.HK

Follow Instagram: businessfocus.presslogic

Share to Facebook